My Boat (Closed)

My Boat 嘅裝修以海洋為主題，整間店以藍白色為主，放置咗好多相關嘅擺設同相片，連枱上面嘅鹽樽同胡椒粉樽都係燈塔造型，十分討好。呢度嘅套餐選擇非常多，由 A 數到 U，除咗主菜外，仲包括餐湯或沙律，餐飲同甜品，加錢仲可以配小食。我哋分別叫咗黑松露帆立貝雜菌燴意大利飯同埋香蒜煙鴨胸雜菌意粉，前者有三粒超大粒煎得香口嘅帆立貝，雖然 Risotto 煮法唔算好正宗，但係個忌廉汁就幾 creamy 幾好食；後者煙鴨胸又係煎得好香口，啖啖肉，好好食，雖然個意粉冇乜汁較為乾身，但係配埋味道較濃嘅煙鴨胸一齊食就剛剛好。食完主菜，意猶未盡，加多十蚊叫多三條蜜糖黑椒腸，製作看似簡單，但由於落咗好多蜜糖，加上外皮烤得微脆，又香又甜，好味👍。最後不得不提佢哋個甜品，原來係菠蘿味啫喱😮，我已經唔記得有幾耐冇食過啫喱，童年回憶當堂返哂嚟😆。幫襯當晚係除夕夜，兩個人食到肚滿腸肥，埋單竟然只需百零蚊，真係超級抵食🥰。等𨋢期間，見到門外貼咗張 “送你好時光餐” menu，原來呢度 weekday 晏晝免費請學生手足食嘢，並註明 “歡迎年輕人合法集結”，又係一間超級有良心嘅黃店♥️。