101台式休閒餐廳 (尚德商場) (Closed)

去將軍澳探朋友，然後一齊響附近醫肚，朋友介紹我黎呢間101台式休閒餐廳，晚餐時間都幾多人等位，好彩我地唔係等左好耐。餐廳裝修得唔錯，牆上有書架裝飾，好有文藝氣息，地方都幾寬敞，我地坐嘅卡位好闊落，坐得幾舒適。呢度需要出去收銀處點餐，我叫左個自選台灣涮涮麵，$48有一個火鍋湯底、三個餸、一個麵，仲包埋飲品，凍飲都只係加$2，呢個餐真係好抵食呀！鮮茄湯底+台式拉麵+芝士腸+唐生菜+滷水蛋，好大一鍋，湯底好鮮甜，味道唔錯，拉麵幾彈牙，餸菜份量都幾多，天氣開始凍最啱就係食火鍋！仲點左個小食-鹽酥雞塊，雞塊份量都係幾多，仲大大塊，外層炸得酥脆，裡面雞肉嫩滑，有少少辣，幾惹味！食完熱氣野，飲番杯柑桔檸檬，酸酸甜甜，清熱解渴。以咁抵嘅價錢食到咁好食嘅涮涮鍋，真係非常值得推介！