韓圈 (Closed)

天水圍本身真係冇乜嘢食，近排天一商場好似開咗幾間新嘢，我哋去嗰度嘗下鮮。環境幾闊落，抽氣系統又幾好，成間店都唔太大陣味，感覺幾好。我哋點咗雞煲火鍋兩食，雞煲味香濃，雞肉又嫩口，好有驚喜。食到最尾會加三寶落去炒，豬皮、魷魚同牛柏葉，三樣都非常新鮮，炒落去唔算鹹，而且好有新意。之後就換蕃茄海鮮湯底，湯底本身滾起都飲得，非常甜，入面仲有少少水蟹食下。依個海鮮拼盤真係不得了，有蝦、蜆、魚同蟶子，件件都大大隻，而且非常新鮮。蝦非常彈牙，蟶子爽嫩，蜆大大粒冇沙，魚腩肥美同魚片都好有魚味。依啲海鮮都係每日喺街市度買返嚟，非常有心機。黑豚肉同手切牛肉都非常有驚喜，特別係牛，睇得出有幾新鮮。牛肉唔會好多肥膏，又冇筋，牛味又香。黑白魚滑，食到粒粒魷魚，淥落去彈牙鮮嫩，一啲都唔馬虎。另外仲有花膠鮑魚附送，比平時酒樓食嘅更高質，特別係鮑魚，入味而且口感超好。手工餃子都好味，皮雖然唔算薄，但餡料豐富。仲有椰子飲，清甜椰香，生津解渴。依度嘅雞煲火鍋完全係良心推介，雖然地點係比較偏僻，但真係抵食💖適合一班人聚會。