紅番茄餐廳 (Closed)

深水埗原來有一個咁好食既西餐廳，好彩今日同男朋友拍拖周圍行下先發現，真真正正既平靚正！！真係超級推薦所有人黎試下，包你一試回味！入面既裝修，環境非常非常之靚！勁有情調，我地睇到都覺得好浪漫！地方唔算大，但環境真的好正，枱椅餐具超級乾淨，好舒服～先黎個餐湯，我地一人要一款，一個蕃茄薯仔湯，一個忌廉白湯，忌廉白湯比較清，蕃茄薯仔湯既蕃茄好足料，蕃茄味勁濃。跟住就係呢個牛油多士，非常脆口，份量岩岩好。跟住就黎主菜啦，我就叫左個日本空運肥牛肉眼扒配蒜蓉汁跟白飯，好厚既一塊扒，牛味勁濃，有小小牛既肥膏，但食落去唔會太油，仲好香！男朋友就叫左個西班牙黑毛豬二件配黑椒汁跟意粉，勁大塊又厚既兩塊黑毛豬扒，第一次！真係第一次食到咁嫩咁好食既豬，唔會"鞋"口，唔會老，啖啖又香又滑又嫩既肉放入口，回味無窮呀！！我地另外仲叫多左個厚切原條鰻魚，真係原條咁大條，燒得岩岩好，又嫩滑，又厚，好有口感。最後仲有甜品同飲品，甜品好似次次唔同，餐廳推介。今日就有呢兩個，啫哩同抺茶雪糕！每人先百幾蚊，有咁多野食，會唔會太過抵食呀？超級推薦呀！