十戶 (Closed)

今次特登去咗土瓜灣食一間居酒屋，因為之前路過幾次見到好似幾吸引去到個環境好靚，好有日本居酒屋嘅感覺，同埋個環境都好乾淨。前菜叫咗酒盜芝士，味道偏濃，不過都幾好味，不妨一試。另外叫咗一個枝豆，都幾大碟幾抵食。之後見到今日有日本真蠔，估唔到咁大隻，一啖食落口成個口都充斥着鮮蠔味。燒物就叫咗燒免治雞肉棒(付無菌雞蛋)，每次去居酒屋都必定會叫嘅食物，串雞肉棒配埋個蛋汁真係一絕。豚腩肉包糖心雞蛋，因為太大隻所以用刀切開，入面係一隻留心蛋，配埋出面夠脆脆地嘅豬腩肉，超級好味。仲叫多咗雞皮同茄子，都係平時必叫嘅燒物。刺身就叫左五點盛，全部都新鮮，一放入口就充斥着濃濃嘅魚生味。因為我地好鍾意食蝦，所以試埋佢哋個炸蝦天婦羅，呢度個天婦羅做得幾好，上碟嗰陣時唔會油淋淋。最後叫多咗個燒飯團送清酒，為今晚嘅晚餐畫上一個完美嘅句號。