一鼎‧台式火鍋 (MOSTown新港城中心(4期))

Open Now

Now Closed

一鼎係上月新開嘅台式火鍋店，除咗有唔同任食套餐之外，連台式飲品都有得任飲。有四種級別嘅餐可以揀，我就揀咗$339嘅120分鐘澳洲200日純穀飼牛套餐。湯底一人一鍋，分別係紅燒火牛同埋呷醋豬，牛湯似台灣牛肉麵湯底，豬湯酸酸哋。先來幾碟小食開下胃。滷水牛筋夠大舊，軟滑入味。三星蔥燒串花枝蔥清香彈牙。藤椒虎皮雞爪惹味刺激。紅噹噹蝦球成粒荔枝咁樣，火紅脆粒包住蝦丸，外脆內彈，出面啲中菜一碟起碼一舊水，呢度任食。試咗三款牛肉，分別係澳洲純和牛、澳洲200日穀飼牛、澳洲黑安格斯封門柳，切得較薄，淥十秒就食得，唔會太油膩。值得一提嘅係青花椒牛舌，香濃爽滑，令我食完又食。海鮮方面，海蝦同大蜆夠新鮮。另外仲有唔同花款嘅海鮮滑，例如粒粒蟹子花枝滑。飲品有茶、汽水等基本選擇，但呢度就當然要叫主打嘅台式飲品。全部都可自選甜度、冰量，即叫即沖，百香果三重奏清新，黑糖珍珠牛乳濃郁順滑，香水爆檸酸香清爽，芝士琥珀最出色，芝士奶蓋鹹香綿密，茶香醇厚。📍一鼎•台式火鍋馬鞍山鞍祿街18號MOSTown新港城中心（4期）2樓2001號舖