鐵牛台灣牛肉麵 (旺角中心第一座)

Open Now

Now Closed

今日係一年一度嘅大年三十，喺下午嘅時候我們去咗旺角中心嘅「鐵牛台灣牛肉麵」食下午茶，之後去大姨媽屋企做節！一入到店內見到店員嘅笑容都幾好，喺坐低咗之後我們睇見餐牌有多款選擇，諗緊揀邊款嘅時候，坐喺我們後面卡位嘅小姐就向我們介紹有邊款比較受歡迎，我們問佢點解會咁清楚邊款好食，佢話佢係喺呢間公司做，今日放假返嚟食嘢，我們就話你休息緊都咁落力向我們推介，你真係專業同值得一讚！我們叫咗主廚私房牛肉麵「大塊金錢𦟌、秘製牛腩同香滑牛筋」嘅湯底相當清甜濃郁，金錢𦟌嘅肉質超級軟滑腍身，而且有入口即溶嘅感覺，秘製牛腩嘅肉質相當爽滑，但唔會有硬實嘅感覺，而牛筋就非常軟滑彈牙！鮮蕃茄大塊牛肉麵嘅湯底真正新鮮蕃茄濃湯，味道好鮮甜清新！紅燒牛肉乾拌麵嘅醬汁味道調教得恰到好處，唔會好鹹，加埋啲香蔥、雪菜同青瓜絲一齊食，感覺相當清新，唔會有好油膩嘅感覺！最值得讚賞嘅係他們出品嘅麵質真係極之煙韌彈牙，無論係乾拌或者係放湯嘅都一樣咁彈牙，唔會因爲喺湯浸著而變腍咗，真係超正呀！係本人嘅必食推介！