方叔叔重慶老火鍋 (PopCorn 2) (Closed)

今日同朋友去左將軍澳方叔叔食重慶火鍋，入到鋪頭，見到渝味曉宇既字樣，原來方叔叔前身就係渝味曉宇，之前都食過，記得都好正。一坐底，店員先放底碗糖水，比食客打邊爐之前先暖暖胃，好窩心。呢度湯底唔係一鍋鍋計，係人頭計，特別湯底就加啲錢，咁都幾抵。我叫個麻辣湯同莞茜皮蛋鴛鴦鍋，都係每人38蚊位，唔似其他火鍋店一個鍋都百幾二百蚊。我同朋友都鐘意食魚，所以叫左幾款魚，白鱔、龍躉片同耗兒魚。頭兩款好味唔再講，耗兒魚原來係剝皮魚，都唔錯，肉質緊緻幼細嫩滑。呢度好多特色蔬菜，平時唔多叫菜既我都想試試。師父刀功一流，一片片長長厚度一致既萵荀片，鮮甜爽口。第一次食海帶苗，好鮮嫩，唔似平時食到既比較厚。乾貢菜，完全唔知咩黎🤣，但恰完之後吸哂啲湯，食起黎好脆口。季節限定既晨洲生蠔，好肥美，好鮮味。呢度有大大杯飲品，叫洛神花鮮橙特飲及水仙烏龍檸檬茶，清甜解渴。