Primo (Closed)

男朋友尋晚睇波，意大利打贏比利時，都知佢係意大利fans, 今晚請佢食pizza, 不過食乜都係我話事。羽衣甘藍凱撒沙律+煙三文魚羽衣甘藍好新鮮，巴馬臣芝士份量亦都唔少，基本上每口都充滿羽衣甘藍同芝士，加上蒜蓉麵包糠同蕃茄，食落又健康又滿足，煙三文魚加$25，有三大塊，都算合理，算係不錯既沙律。煙肉帶子串一碟有4件，賣相同menu 相片一樣好吸引及精緻，打卡一流，帶子大隻，好厚身，煎得半熟，可惜嫌鮮味不足，好彩有清新嘅芒果醬同鹹香煙肉搭救，呢個starter等左好耐先上枱，主食上左一段時間先黎，等到頸都長，難免少少失望。墨西哥雞肉及西班牙辣肉腸薄餅好在個pizza 冇令我地失望，話晒食pizza因為意大利贏波。Pizza熱辣辣,芝士溶化牽絲，好同意waitress 所講，咁先食到真正既pizza味道, topping同芝士比例幾平均，呢度嘅芝士唔係爆多嗰種，西班牙辣肉腸好惹味，加上墨西哥嘅辣椒，成個Pizza好香口，pizza 餅底麵包外層考得好香脆，咬落煙韌有口感，且有火爐烤香嘅感覺，幾滿意。如果意大利繼續贏，一於再黎試下其他口味嘅Pizza。