無辣不歡 (Closed)

假日工人姐姐放假，父母拍拖一早出佐門， 大家姐閉關繪圖趕deadline，所以主要係我同二家姐一齊食午餐，於是我呢個做細嘅就要搭車落葵芳外賣食物返嚟比佢哋食。因為二家姐鍾意食麻麻辣辣嗰啲香口食物，所以我就行咗嚟無辣不歡買啲外賣返去食。以前都嚟呢間無辣不歡食過都幾好味，最重要就係二家姐鍾意食，當然我都鍾意食啦。麻辣土豆絲，其實叫薯仔絲仲好過啦，呢度係香港，做乜嘢叫土豆呢，不過點都好啦，啲薯仔絲好淋，淋得嚟又好爽口，味道好麻辣，越食越滋味。麻辣手撕雞，手撕雞就最好因為冇骨啖啖都係肉，手撕雞唔係好似預期咁麻辣，不過都好入味， 唔係太受得辣嘅大家姐就比較鍾意食呢個手撕雞。麻辣大腸，呢個大腸係豬大腸，係三種食物裡面最麻辣嘅，佢嘅麻辣程度，就係辣到由腳板底衝上頭頂咁樣，真係麻辣得好緊要，我二家姐就食得非常滋味，佢真係無辣不歡，可謂盡得阿爸嘅真傳。如果一邊吃食麻辣野一邊飲汽水會係好正， 不過我一時大意唔記得咗買汽水，搞到成件事都唔同曬。