正月十五 (Closed)

食完熱狗後意猶未盡，又決定去食返碗糖水。來紅磡前已鎖定「正月十五」呢間糖水店，因為見到全部都係笑面，一個負評都無，而且D糖水好似好特別，竟然有蜜糖黑松露糕，又有小妹愛食既芒果糯米卷，好期待啊!.店子座位唔多，環境唔大，但好彩未至於要背貼背。牆上貼滿糖水海報同黑版寫上招牌糖水及是日推廣，睇落款式好多呢!.咁就一於叫個芒果糯米卷先，店員話無..再叫蜜糖黑松露糕..竟然又無..想叫個榴槤水晶珠又無..!心面已經開始無名火起，可以叫三樣都無? 但坐左入黎走出去又好樣衰咁，後尾見到有塊版寫住滋潤甜品，叫左個3.6牛乳燉椰皇，又話無囉!! 咩事啊? 無既好心刪左佢啦....連隔離檯叫個阿華田雪花冰都話無，真係吹漲，麥兜情節咩!? 最尾叫左個楊枝金露同擂沙湯丸。.楊枝金露 $33其實我唔明點解佢可以有咁多好評，呢碗價值$33既楊枝金露柚子肉既份量係極其少，我諗少到有幾多條都數到個種，但奇就奇在加埋一般唔會有既椰果同爆爆珠，味道一般。.擂沙湯丸 $22睇相係一客四大粒，黎到變左迷你版八粒，好彩食落微熱，煙煙韌韌，正常味道啦!