星海．譽宴 (鱷魚恤中心)

Open Now

Now Closed

我地平時都好鍾意飲茶，今日lunch hour 去左譽宴試吓呢個午市套餐，果然係唔錯嘅選擇！一坐低黎返壺茶先！我鍾意飲鐵觀音，啖啖回甘味，呢到嘅茶落足茶葉，飲落好夠味👍🏻豐料老火湯，今日應該係老黃瓜湯，一個瓦煲有成5-6碗，味道濃郁，飲得出無落味精。點心拼盤，4款點各兩年，燒賣、蝦餃、潮州粉果、穀物糕，即叫即驚熱辣辣送到，味道唔錯。燒味拼盤，叉燒、燒肉、海蜇。叉燒甜蜜，燒肉香脆不肥膩，海蜇爽口彈牙，呢3寶無得頂。杭州香醋一口骨，炸得夠鬆脆，每一口都佈滿杰撻撻嘅香醋汁，再加啲香薑絲伴碟，開胃醒胃。乾隆石窩炒飯，上到枱時仲喳喳聲，拎鐵羹再炒兩炒，香氣撲鼻。加了帶子粒、瑤柱、翠玉瓜，令分明嘅米粒不會太乾。今日嘅精選甜品係紅豆沙，食入口啖啖紅豆溶，非常有誠意。限聚令下無損茶腳心情，午市依然座無虛席，可見食物質素有返咁上下吸引。