曦

Open Now

Now Closed

香港越黎越多高級鮨店，尤其哩兩年出唔倒國，更加多人捨得食。㬢同其他鮨店好唔同，因為全店得一個$1800/人嘅套餐，而且完全冇簡介有咩食，真真正正係廚師發辦，會多左一份期待感。㬢店面唔大，圍住壽司吧檯大約可以坐倒12個食客，一貫淺木色設計，感覺舒服。墨魚醋物 - 先黎一道開胃小菜，入面除左有墨魚，仲有青瓜同紫菜，酸酸地非常開胃。廣田灣生蠔 - 生蠔好大隻飽滿，海水味唔會太重，就咁加少少青檸汁食就得。真鯛 - 真鯛黎自愛媛縣，師傅將佢薄切，中間再包住北海道馬糞海膽，因為加左海膽，所以整個味道都好鮮甜。沙甸魚磯邊卷 - 磯邊卷入面放左好多沙甸魚，中間係芽葱，魚味幾重。北海道白象拔蚌 - 師傅喺象拔蚌上面落左岩鹽同青檸，象拔蚌口感爽脆。瀨尿蝦 - 師傅將瀨尿蝦 燒到暖暖地，加左岩鹽，所以可以唔洗蘸豉油，就咁用紫酥葉包住食，瀨尿蝦肉質軟腍有彈性，紫酥葉味道比較強，我自己就鍾意空口食多啲。等師傅上菜期間，都會食下啲配菜，食完師傅會再加，今次第一次見有芥菜頭，食落有少少似炸菜。燒太刀魚 - 似似地本地嘅牙帶魚，佢比較多油，食之前可以加青檸汁，等食落冇咁膩，如果唔夠味先蘸酸汁食，我自己就鍾意配酸汁食。