皇庭匯 (Closed)

今日下午我們喺大角咀附近做完嘢之後去咗已經有一段時間無嚟嘅「皇庭匯」旺角店飲下午茶！可能我們真係好耐無嚟，所以喺點心紙度睇到有多款新推出嘅點心！我們叫咗日式櫻花蝦煎薄罉同平日食開嘅唔同，因材料通常祇會有香蔥，但呢度就加咗櫻花蝦，令到味道多咗一番鮮味，而且煎得外脆內軟，質感相當煙韌彈牙，諗唔到中式嘅煎薄罉加埋日式嘅櫻花蝦，出嚟嘅效果會係咁好，真係創意十足！燒汁魚肉釀茄子算係我們每次嚟都會叫嘅，因魚肉好厚身同鮮味彈牙，夾埋軟滑嘅茄子，再淋上惹味嘅燒汁一齊食，真係超正呀！羅漢齋粉包一送到嚟嗰陣見到兩個超級加大碼嘅粉包，開頭以為祇有厚厚嘅粉包，點知一拆開嚟睇就見到有相當足料嘅餡料，真係好抵食呀！海螺片棉花鷄嘅份量多到滿瀉晒出嚟，頂層係兩片爽滑嘅螺片同蟹柳，中間係燜得好腍好入味嘅魚肚，而底層就舖滿晒嫩滑嘅鷄肉，真係好好味！百花玉子蒸豆腐嘅頂層係爽甜彈牙嘅蝦肉同豬肉，而底層就係滑溜嘅玉子，夾埋一齊食，層次感好特別！茶壺奶皇流沙包係眾多點心之中我們最期待㗎，因造型賣相係一個相當趣緻可愛迷你小茶壺，撕開一半見到入面有滿滿香甜濃郁而且非常軟滑嘅奶黃餡，係本人嘅必點推介！