Video
Read full review
2024-05-03
241 views
今日約家姊食飯，兩姊妹超耐無單獨約會，自從佢成家立室，總係有姨甥女/仔係度阻頭阻勢，做電燈膽。諗起以前細個，最期待星期六日唔使返學，會成日同家姊一齊去M 記食下午茶，跟住穿梭屋邨既文具鋪同零食店，好懷念呀！証明姊老了！！家姊話想試方叔叔打邊爐好耐，今日一於試下真正既重慶火鍋，究竟姊食得幾辣🌶一入到去，麻辣味已經撲鼻。環境好舒服，座位闊落，卡位張枱仲好大添，留意到卡位同通道隔離張枱有一段距離之餘仲唔係平排，咁樣距離感會提升，好好既設計。鴛鴦鍋其中一邊係麻辣湯底，另一邊我嗌咗豬肚雞，好濃郁嘅胡椒&雞味，仲有唔少豬肚。我嗌咗碟現炸豆皮，尼個現炸豆皮真係必點，超有豆香味。豆皮放麻辣果邊姊真係頂唔順，因為會索晒啲湯汁，但放豬肚雞嗰邊簡直係一流。大部分菜式都有寫明建議淥幾耐時間，跟足建議既時間，確實係無錯，真係啱啱好。方叔叔既材料非常新鮮，海鮮上枱時仲有冰保持新鮮度，見有4月至8月既春季限定，嗌左半份鮮活海蟶，好肥美，好鮮甜，完全唔使蘸醬油，早知就嗌全份喇！想講方叔叔令我對黑毛肚&桂花蚌有好大既改觀，跟足建議淥既時間，超級脆口，係用脆黎形容，蘸蒜頭+麻油，香到無得頂。坦白講，我本身麻麻毛肚&桂花蚌
家姊話想試方叔叔打邊爐好耐，今日一於試下真正既重慶火鍋，究竟姊食得幾辣🌶一入到去，麻辣味已經撲鼻。環境好舒服，座位闊落，卡位張枱仲好大添，留意到卡位同通道隔離張枱有一段距離之餘仲唔係平排，咁樣距離感會提升，好好既設計。
鴛鴦鍋其中一邊係麻辣湯底，另一邊我嗌咗豬肚雞，好濃郁嘅胡椒&雞味，仲有唔少豬肚。我嗌咗碟現炸豆皮，尼個現炸豆皮真係必點，超有豆香味。豆皮放麻辣果邊姊真係頂唔順，因為會索晒啲湯汁，但放豬肚雞嗰邊簡直係一流。
大部分菜式都有寫明建議淥幾耐時間，跟足建議既時間，確實係無錯，真係啱啱好。方叔叔既材料非常新鮮，海鮮上枱時仲有冰保持新鮮度，見有4月至8月既春季限定，嗌左半份鮮活海蟶，好肥美，好鮮甜，完全唔使蘸醬油，早知就嗌全份喇！
想講方叔叔令我對黑毛肚&桂花蚌有好大既改觀，跟足建議淥既時間，超級脆口，係用脆黎形容，蘸蒜頭+麻油，香到無得頂。坦白講，我本身麻麻毛肚&桂花蚌，係家姐想食先至嗌，但我諗我會掛住方叔叔既黑毛肚&桂花蚌。
牛肉我地就嗌左美國Prime牛小排（半份） & 手切牛（半份），2隻牛肉都好有油香&牛肉味，而手切牛口感軟彈，所以手切牛略勝牛小排。
唔可以唔提既就係2杯巨型飲品，洛神花鮮橙特飲&水仙烏龍檸檬茶，見到都好開心，仲要好飲，48蚊咁大杯特飲，係打邊爐嘅世界簡直係恩物。材料關係，洛神花鮮橙特飲會比水仙烏龍檸檬茶濃味🍊，而水仙烏龍檸檬茶就啖啖清香🍃。
最後，俾姊發現有黑糖糍粑，梗係點都要食埋佢先收手。炸得啱啱好，超級軟糯，中間係流心黑糖，姊對軟糯既食物係無抗拒能力🤤
📍 方叔叔重慶老火鍋
觀塘觀塘道418號創紀之城五期(apm)5樓L5-2號舖
Post
