抖蛋馬來西亞古早味蛋糕 (啟德) (Closed)

今日第一次去沙中綫嘅啟德站，一出站就聞到好香嘅蛋糕味，原來係一間古早味嘅蛋糕店新鮮出爐。佢哋嘅蛋糕有四種唔同嘅口味，原味、流心鹹蛋、芝士同榴槤，係每日唔同時間出爐，我去嘅時候就正正係原味同流心鹹蛋出爐嘅時間，所以各買咗一個試下。佢嘅流心鹹蛋黃真係令我好驚喜，初初以為會好乾、或者好膩，但係蛋糕非常濕潤，軟綿綿好似枕頭咁，有滿滿嘅鹹蛋黃醬，亦都唔會太甜。而原味就好香蛋味，而且佢哋嘅蛋糕非常大個，如果即日食唔晒，就算放咗入雪櫃第二日再食都一樣咁好食，真正古早味嘅蛋糕熱食同凍食都咁好食。