越好

Open Now

Now Closed

今日和朋友到沙田辦事，有啲匆忙，就去咗沙田火車站上蓋嘅連城廣場醫肚，見到呢間馬來亞嘅過江龍越南餐廳，就好想試下。餐廳嘅裝修好特別，用咗好醒目嘅黃色，簡潔明亮，感覺乾淨企理。侍應非常勤快，坐低即遞上餐牌，我和朋友各叫咗小食、河粉、和飲品。食越南嘢一定要試下佢嘅招牌菜 ~ 越南生牛肉河啦，朋友就要咗熟牛腩河，仲請我食咗兩件添 。生牛肉河 ~ 湯底好香濃，應該用咗大量嘅牛骨淆製，好清甜，又有牛味，牛肉帶粉紅色，好嫩滑，加少許青檸汁、辣椒、配上五層塔香菜，真係超好味。朋友嘅熟牛腩河 ～ 牛腩做得好鬆軟，帶少少肥，一啲都唔韌，又保存到牛腩嘅咬口。越南炸春卷 ～ 一客有五件，份量一啲都唔少，外皮做得鬆脆，唔油膩。炸蝦餅 ～ 炸得金黄，上碟賣相唔錯，沾甜酸醬食，好開胃。青檸梳打 ～ 可能畀嘅青檸足料，有好濃嘅香檸清香，再加上薄荷葉嘅襯托，夏天飲好適宜，感覺好清涼，令人非常舒爽。紅豆冰 ～ 紅豆煲得好腍，唔太甜。嚟呢間餐廳以咁嘅價錢，食到質素唔錯嘅越南食物，真係算係好抵。