Just Eat (Closed)

呢間位於般咸道附近嘅越式餐廳， 已經開咗一段時間，一直都好想試，今日終於同朋友嚟試。餐廳嘅地理位置並唔難搵，喺西營盤站c出口行只需要三分鐘就可以到達，十分方便。 餐廳嘅裝修行簡約風，餐廳十分乾淨。睇完menu覺得佢嘅嘢食都好吸引, 每一樣都想食, 最後叫咗一個牙車快，一個春卷， 一個濃味牛湯浸牛肉河。 牙車快其實係雞肉生菜沙律， 佢嘅蔬菜其實幾新鮮，作為一個前菜酸酸甜甜其實幾開胃。春捲方面仲會配埋生菜同醬汁，可以包住春捲食，食落爽爽脆脆，春捲仲要係現炸，夠熱又新鮮，餡料亦都好多， 個人覺得小食嚟講都唔錯。至於濃味牛湯浸牛肉河顧名思義就係牛肉湯加肥牛河粉，不得不說，呢個湯河好有誠意，河粉超多超大碗，裏面好足料，牛肉亦都有好多，而且煮得剛剛好，唔會好韌。飲品方面，我同朋友分別叫咗一個越式凍檸檬茶同菠蘿柚子梳打。 凍檸茶味好香濃 檸檬味同甜度亦都剛剛好， 菠蘿柚子梳打就更加好飲， 佢嘅菠蘿係煮過嘅，好好食，配埋梳打剛剛好。