拾壹麵 (Closed)

夏天到啦天氣熱，想食返碗面濕濕口。經過附近見到店員話佢個湯底好特別，完全冇加味精，咁少見就試吓啦。我自己就叫咗個金牌豬膶，滷水豬大腸，古早回味豬手，配蝦籽粗麵。豬膶爽脆粉嫩;大腸睇個顏色就知道好入味，香羶不肥膩；豬手炆得夠火喉，充滿滑溜嘅骨膠原，正。湯底就好似屋企媽咪煲嘅豬骨湯咁，清甜唔會過鹹，飲多幾碗仲得。蝦子粗麵完全冇鹼水味，煮得軟硬適中，唔錯。朋友就叫左滷水五花肉，台灣紅燒牛肉，豬手配爽滑米線。五花肉肥瘦相間，個皮q彈煙靭，滷水夠香唔鹹。燒牛肉入口即化，醬汁惹味。米線滑得來有咬口，朋友讚好。因為都係晚餐時間比較肚餓所以就試咗幾款小食，鹽酥雞中翼，睇落去就平平無奇，但一用筷子夾落去就知道出色，個皮脆到不得了，而且入邊勁多肉汁，嗰陣時要小心燙到！咁juicy 明顯地係生炸嘅靚雞翼，少見！蔥油小圓餅，估唔到入面有豐富嘅肉汁，講緊多到好似小籠包咁上下，餡香皮又薄，正！陳醋木耳本來以為同出邊嘅冇乜分別，但原來佢嘅醋係特別調配過，加上小小嘅辣椒，開胃到不得了！必食。簡簡單單幾個小食同面都食得出廚師嘅用心，同埋功架十足！要再嚟試多幾款小食先得！