銀杏館-越老 (Closed)

呢間係我飯堂之一嘅餐廳，每次食完都會覺得好滿足，而且，久唔久會有新菜式，前菜又會轉，之前食過咖喱同厚切豬扒都相當好味，今次終於有機會帶男朋友一齊食。入面裝潢時尚有特色，侍應係一班老友記黎，服務相當好，係一間好有水準嘅社企餐廳。今次叫左兩個午餐，每人平均$70。自助前菜雖然只有幾款選擇，但樣樣都好有誠意，唔敷衍。我特別鍾意食呢個通粉沙律，今次好好彩又比我食到，微微黑胡椒味加甜甜地嘅醬，通粉整到好彈牙，仲有火腿粒係入面。湯係中湯黎，味道好濃，有好多紫菜同蛋花好足料。烤豬肉越式法包 $68法包外脆內軟，中間餡料有芫茜，白紅蘿蔔絲，蕃茄，青瓜同豬肉，口感好豐富，豬肉好嫩好香，再有醬咸咸地係入面，所以唔洗擔心會好乾。南乳雞扒撈檬 $59近來新推介嘅菜，份量一如過往都係咁多，南乳醬平均搽滿雞扒面，味道濃又無過咸，雞扒好大塊，好嫩滑好多汁。蛋煎到好靚，維持到蛋白熟透得蛋黃流心。檬粉正常無變一舊，甜酸汁比較偏甜，酸味岩岩好，好開胃，好岩夏天食。