早安越南 (Closed)

今晚條越南癮又發作, 要搵D 越式野食止下癮。Search 附近地方, 最近就係呢間早安越南, 就即管試下。入座時未夠7 點, 唔需要等位。好鍾意呢到既裝修, 比一般越南餐廳modern, 燈光比較暗, 幾有情調, 坐得舒服, 服務態度好。menu 都有好多選擇, 但食越南野我鍾情蔗蝦, 金邊粉, 今晚都唔例外呀, 另外叫多個菜健康下。呢到既庶蝦比我平時食開既大, $82 有4大舊, 炸得金黃, 唔會太油, 蝦肉爽口彈牙, 舊蔗仍然充滿蔗汁, 配埋最夾既甜酸醬, 仲有最緊要上枱仲係熱la la 的,好味道。我既最愛-越式炒金邊粉($80), 炒得乾身, 唔會炒到好油,唔會炒到一pat pat , 甜甜酸酸的, 味道岩岩好,  有蝦, 有扎肉, 芽菜, 蛋絲同炒, 面頭仲有D 炸乾蔥, 撈埋一齊食, 更加好味。 馬拉盞炒通菜($67), 咁多種炒菜, 最鍾意都係食馬拉盞, 夠惹味, 呢到炒得唔油, 唔會炒到好老, D 菜仲好脆綠。總括: 唔錯, 最鍾意D 食物夠熱, 會再來的。