Video
Read full review
2017-06-29
2161 views
早排先去完"Bistro" Pizza Hut食薄餅，估唔到隔無耐又嚟食薄餅，事緣早前同食友傾開依間「特別」嘅必勝客，佢話試過有間薄餅小店晌長沙灣，二人餐非常抵，再問詳細啲位置，正正順寧道尾，啱啱就喺上次一齊晌Choo Choo食飯嘅表姨甥女樓下，所以，索性搵佢聚一聚。對順寧道幾熟，因為有幾個親戚住呢區，佢話間鋪喺Pizza Hut隔離，就大概知邊度。而且，夠瞻正正開晌Pizza Hut隔離，估計有一定嘅自信。餐廳冠以Cafe為名，內裡裝修都睇得出花過啲心思，仿水泥地磚，水泥牆身，藍黑鋼椅，水喉通壁燈，帶點粗獷嘅工業風。加上樓底夠高，空間感足。兩組餐牌，一個喺主餐牌，主要羅列晒所有散點菜式，設計精簡，類別分為小食、雞類、燒烤、沙律、薄餅、意粉、焗飯、甜品、多人套餐及飲品。另一組喺啲套餐超值餐牌，主要都喺一個人份嘅，定價都算親民，而且，全日更免收加一。就喺因為聽食友推介咗佢個「豪華二人套餐 」（$178）超抵食先會嚟，所以，未坐落已篤定叫呢個餐。雖則話二人餐，但份量足3個人食，包餐湯兩客、任何款式嘅6吋薄餅、細凱撒沙律、飯、粉、小食類任擇1款，雞類 2 件或細醬燒豬肋骨、咖茶2杯。順便講
對順寧道幾熟，因為有幾個親戚住呢區，佢話間鋪喺Pizza Hut隔離，就大概知邊度。而且，夠瞻正正開晌Pizza Hut隔離，估計有一定嘅自信。餐廳冠以Cafe為名，內裡裝修都睇得出花過啲心思，仿水泥地磚，水泥牆身，藍黑鋼椅，水喉通壁燈，帶點粗獷嘅工業風。加上樓底夠高，空間感足。
兩組餐牌，一個喺主餐牌，主要羅列晒所有散點菜式，設計精簡，類別分為小食、雞類、燒烤、沙律、薄餅、意粉、焗飯、甜品、多人套餐及飲品。
另一組喺啲套餐超值餐牌，主要都喺一個人份嘅，定價都算親民，而且，全日更免收加一。
就喺因為聽食友推介咗佢個「豪華二人套餐 」（$178）超抵食先會嚟，所以，未坐落已篤定叫呢個餐。雖則話二人餐，但份量足3個人食，包餐湯兩客、任何款式嘅6吋薄餅、細凱撒沙律、飯、粉、小食類任擇1款，雞類 2 件或細醬燒豬肋骨、咖茶2杯。
順便講吓，依度茶水、餐具自助，既然無收服務費，就更加唔介意自己招呼自己啦。
然而，一堆調味料如辣椒仔、茄汁、芝士粉……等等，早已放晒晌枱面自由任用，夠大方唔使成日煩到啲店員。
芒果森林 +$17見個套餐咁抵，所以，就貪得意加錢試試沙冰系列嘅芒果森林，即喺芒果沙冰，入口超冰涼，非常之爽，芒果咪亦頗濃郁，唯一美中不足喺沙冰未夠幼細，仲有些微冰粒感。
海洋世界 +$12表姨甥女見我轉特飲，佢都唔執輸，試咗梳打系列嘅海洋世界，顏色好靚，同樣感覺清爽，味道就唔喺好特別，喺加入藍色糖漿嘅檸檬梳打。
羅宋湯、忌廉湯餐湯嘅選擇就比較普通，港式西餐常見嘅紅湯、白湯，老實講，質素又講唔上有咩特別，叫做平穩，羅宋湯做番出應有嘅酸辣味，撈一撈原來亦有唔少料；忌廉湯口感綿滑，至少唔會太杰或太稀。
凱撒沙律兜沙律雖然較似一人份量，但做得有驚喜喎，驚喜在於諗住水準唔會高，但啲羅馬生菜冰涼爽脆，醬汁撈得均勻，配上脆口嘅麵包粒同煙肉碎，更撒上芝士粉，真喺交足貨。
海鮮闊條麵因為薄餅已選定泰式辣香雞口味，又有一客細豬肋骨，咁多肉，所以，就揀海鮮闊條麵。雖然唔喺咩靚料，但蝦肉、魷魚、蜆肉、蟹柳鋪得滿滿，又加上唔少芝士，焗得金黃。食味的確不俗，好甘香，唯少少可惜喺啲闊條麵有些微腍身咗，未夠最咬口嘅狀態。
泰式辣香雞薄餅餐牌喺咁樣形容個薄餅：泰式辣醬、洋蔥、青椒、蘑菇、菠蘿、雞肉、黑胡椒及加倍芝士，一拉起件薄餅，果然芝士加倍，多到冚實晒啲餡料，啱晒我啦，今次連芝士粉都唔使落。薄餅喺厚批格，入口十分鬆軟帶少少脆口，餡料豐富，配搭效果唔錯，小弟本身唔喺好算食得辣，但覺得再辣多點就顯得更有個性。
醬燒豬肋骨（細）話喺細份，都有成6支骨，燒得焦香吸引，食豬肋骨點可以用刀叉，搵手拎住食就最滋味，飲住杯沙冰，不知幾過癮。啲豬肋骨做得有水準喎，肉質鬆化又唔嚡，未算肉汁豐盈但絕不乾身，而且好入味，又有焦香感。加埋啲脆香薯角，不油不膩，真好！
總結而言，薄餅做得有水準，個二人餐的確超抵食，飽到上心口，只喺對普遍嘅人嚟講位置吊腳啲，但相信佢哋都喺以街坊客為主，故定價咁親民，實行薄利多銷，值得支持吓嘅小店。
Post
