媽咪雞蛋仔 (Moved) New Location

都唔係第一次食媽咪雞蛋仔，不過之前都係食尖沙咀分店，銅鑼灣分店都係第一次試。雖然雞蛋仔嘅價錢相係比較高，但勝在雞蛋仔真係做到外脆內軟，而且真係非常足料，所以其實都算抵食。今次都係嗌咗粒粒朱古力口味。 可能因為係假日嘅緣故，所以落完單，店員都同我哋講要等大概二十五分鐘先有，所以就喺附近行咗個圈再返去。雞蛋仔一攞上手係非常暖，同埋已經聞到好香嘅蛋味。一口咬落去首先係感受到香脆嘅雞蛋仔外殼，跟住就係一粒粒嘅朱古力脆。 鍾意食粒粒朱古力口味，係因為雞蛋仔入面真係一粒粒嘅朱古力，而唔係單純朱古力味或者係朱古力醬，所以強烈推介。