玖五牛肉麵 (Closed)

有一日放工約咗朋友係灣仔，決定一齊試試超蓮嘅玖五牛肉麵！因為見到平日唔使排隊，而且想食好耐啦～～ 入到去見到餐廳嘅裝潢偏簡約，牆上掛滿明星嘅合照，一坐低就見到有張敬軒嘅相，食牛肉麵都見到軒仔，好開心呀！兩個人叫咗兩個主食同小食，滷肉飯同埋三合一紅燒牛肉麵，雖然價錢唔平，但份量都唔少，有齊牛筋、牛肉、牛肚等等，牛筋夠晒軟腍，牛肚都入味。不過湯底呢就唔係我鍾意嘅味道，因為玫五嘅湯底係啡色，帶少少酸，唔係平時食開好濃郁嘅牛肉麵湯底。我最鍾意嘅都係牛肉麵啲麵，呢隻粗粗地又扁嘅麵配湯食係最正！麵質有咬口之餘，唔會太腍唔會太硬，煮得啱啱好！真係淨麵都可以食一個！