ZENWICH (Closed)

係朋友介紹之下，去左呢間木系裝修好隱世嘅cafe到試吓個排包三文治。餐廳內部有啲三尖八角，門口入口處有面落地大玻璃仲有啲綠色植物，揀左坐果邊嘅雲石矮枱木梳化，望出去嘅景有樓遮擋，真係唔吸引，但勝在馬路較闊同有少少天空，都叫做開揚，可以曬太陽放空一下。-湯無記錯係南瓜薑湯，薑味唔會太過分，淡淡地，成個湯同賣相一樣咁順滑，唔錯，只係略嫌唔夠熱。-我揀左全份嘅蟹肉牛油果三文治，排包烘過，賣相好吸引，除左入面夾左好多蟹肉之外，面頭有大大粒牛油果同蟹子。用佢底下鋪墊嘅紙就可以好輕易拎起成個包。我口唔夠大，仲唔覺意整跌左粒牛油果，食前建議塞晒啲牛油果入包入面先咬。排包甜味夾住好豐富嘅配料，蟹肉伴左少少醬，有啲水份又唔會好重口味，整體感覺好Fresh，不過牛油果略生，但可接受。最開心係，食到最後都依然有料。-另外叫嘅係全份明太子玉子燒三文治，不得不說玉子燒嘅厚度媲美排包，同埋望到捲蛋嘅層次感好吸引，蛋味連同咸香豐富，仲食到鰹魚碎添。只係相比蟹肉牛油果嘅果種清新，明太子玉子燒就會比較「漏」，半份都已經足夠。-另外一提，店舖當日負責嘅員工突然點起香枝，空間有限底下，香味明顯太重太濃，似供神佛多過似食店。