馬來亞春色綠野景緻艷雅

Open Now

Now Closed

睇完米紙嘅介紹先知原來鰂魚涌有咁多間叻沙，本身都好鍾意食叻沙，所以搵日晏晝嚟食。可能因為疫情多數人WFH，lunch time嚟到都唔使等位。餐廳招牌菜係肉骨茶同叻沙，叻沙選擇都幾多，有海鮮、魷魚、咖喱雞、巴東牛肉、沙嗲串燒同三寶。我哋兩個人嗌咗海鮮叻沙、巴東牛肉叻沙同一個馬拉飯。跟餐送嘅是日飲品係冬瓜茶好好飲海鮮叻沙配料豐富，有鮮蝦、烚蛋、魚蛋、魚片頭、魚片、豆卜、通菜同芽菜。金黃色叻沙湯底濃厚充滿椰香，微辣帶點咖喱香味。麵條有油麵同米粉，亦可以揀摻摻，即係兩溝。油麵同米粉吸收咗香濃湯底，好惹味巴東牛肉叻沙同樣充滿椰香而且咖喱香味濃郁，牛腩煮得夠腍又入味馬拉飯帶點蒜香，雖然深色但比想像中淡味。用嚟撈叻沙湯幾好味總括嚟講食物質素高，叻沙用料新鮮又足料，而且份量唔少食得夠飽。下次會再嚟試下肉骨茶。