十二味貴陽牛肉粉 (Closed)

同家人喺銅鑼灣行完街就周圍蕩搵好嘢食，蕩下蕩下畀呢間新開食店個名吸引住，唔知同謝生有無關係嘅呢？呵呵~就係抱住呢份好奇心，一於入去試試啦~餐牌好簡單，一目了然，有3大款牛肉粉畀大家揀，分別係招牌清湯牛肉粉、紅燒牛肉粉同紅油牛肉粉，由於我哋成家人都唔係幾食得辣，所以一致決定捧清湯牛肉粉場，一人一碗~等咗幾分鐘度牛肉粉就上枱喇，齋睇買相都覺得唔錯，湯底望落幾清，大家齊齊試飲一啖，飲得出係用牛骨熬製而成嘅濃湯，盡收精華，估計應該花咗唔少時間同材料去熬，再嚟齊齊試一啖米粉，粗度介乎平日食開嘅米線同米粉，入口相當爽滑~老豆揀咗配牛肉丁，雖然話係肉丁，但其實一啲都唔「丁」，仲幾大粒添~老豆話牛味夠濃，咬落彈牙有口感又夠腍，佢仲貪得意學人撒咗一勺花溪辣椒落去試試，話成碗麵即時更香更惹味~我同阿媽就揀咗牛肉片，夾起嚟睇晶瑩剔透，厚薄恰到好處，咬落肉質嫩滑，牛味香濃，連埋米粉同湯一齊入口，滋味double up，真係估唔到清湯都可以做到咁美味~聽到隔離枱話，原來連習主席都係貴州牛肉粉嘅忠粉，所以牛肉粉喺內地係超級火紅，估唔到我哋一家咁就無意中食咗「國家級美食」！