平昌 Premium (Closed)

天氣凍就想食韓國菜，除左熱氣嘅韓燒，其實仲有健康d嘅選擇，所以同朋友揀左去平昌試下個海神湯。到底依個湯有乜咁吸引？請睇相。我地兩個人點左半隻雞嘅份量，湯入面有人蔘、鮑魚、扇貝、八爪魚、蝦同好多隻大蜆！雞肉唔滑但重點係海鮮好新鮮同好多，食極都有！Oppa侍應幫我地剪雞剪八爪魚同裝湯，裝到靚靚，最啱影相。個湯一定要趁熱飲，凍左d海鮮都無咁好味。人蔘味唔重，啱我口味。除左湯，推介豆腐果仁沙律，豆腐粒炸得好脆。麻醬份量剛好，每一啖都有醬，蔬菜都新鮮。我地仲叫左豬腩肉。通常韓燒爐邊都有蛋，依度仲特別，有一粒粒迷你蕃薯，甜甜地，我食左一粒，其他俾我朋友食曬。蛋我鍾意係佢七成熟嘅時候食，蛋面脆，入面滑。海鮮煎餅賣相靚，煎到金黃色。平時喺其他餐廳食通常唔係好覺有海鮮，但依度就有大粒蝦肉，好足料。依度有卡位坐，舒服過其他坐住個罐嘅韓燒店。燒爐上嘅吸油煙機都吸得夠快，可以減少油煙味，慢慢食，慢慢坐都唔怕成身韓燒味。