車輪餅小姐

Open Now

Now Closed

終於行到一半返屋企了，本身想學高登行路巴打咁由長沙灣行返去荃灣，但真係太攰又開始想落雨咁。所以決定放棄，下次再續。黎到美孚搭車返去算了。臨上車前記得呢間幾出名嘅餅鋪，當然要買返一兩件返去做孝順仔啦。門面幾細，一眼就睇晒前面收銀，後面整餅。係今日推介嘅四款味入面，揀左綠茶同埋柚子OREO麻糬各兩個。因為係鋪頭即場整嘅關係，所以邊等邊聞到蛋餅漿焦香嘅味道。除左車輪餅，呢度都有唔同甜品選擇，但車輪餅嘅味道太吸引，唯有留返下次先食。等左五鐘就到手了。流心綠茶個味超濃郁的，但又唔會得個死甜，甘甘苦苦嘅綠茶味啱啱好，而且車輪餅皮好鬆軟又有蛋味，同個餡嘅味幾夾。OREO柚子芝士麻糬。因為入面個餡料實在太多，所以餅皮會薄啲，但因為咁所以咬開見到層次分明，口感又豐富，麻糬軟糯，芝士順滑，OREO餅又帶返啲粗糙。而柚子芝士嘅酸甜起左中和作用，將麻糬同OREO嘅紮實感大大減低。咁多人追捧，不無道理。P.S外賣返屋企凍左嘅話，記得擺入微波爐叮返熱十零秒，唔係食落會差少少。當然即場食先係最好的。