Spade by Lassana (Closed)

餐廳是開放形式，冇焗促感。旁邊仲有大大嘅玻璃窗可以欣賞晚霞，食得輕鬆自在。餐廳其實有好多SET選擇，但啲餐牌散收收，建議餐廳有系統啲整返本餐牌，等食客一目了然。我哋2人點咗【澳洲特厚和牛漢堡配粟米碎蛋沙律】同埋【熱窩夫全日早餐】，仲有兩杯熱茶。【熱情果蜜桃香草茶】- 用TWININGS茶包沖嘅，聞到好香甜嘅熱情果、蜜桃味，記得泡耐啲，啲味道先會走出嚟。【檸薑香草茶】- 檸薑醒胃，餐前飲就啱晒。【澳洲特厚和牛漢堡】麵包外面皮脆，裡面就非常鬆軟。配搭雞蛋沙律感覺新鮮。一夾啲蛋汁就慢慢流出嚟，沾咗蛋汁成個包就更好食。漢堡真係夠厚，肉汁豐富，漢堡肉入面有洋蔥粒所以食落都香口。份量非常足夠，食完成個包都飽晒。【熱窩夫全日早餐】主角窩夫非常香脆，上面有糖霜又有蜜糖，兩種甜一齊味道加倍。腸同煙肉味道適中，唔會過鹹。炒蛋亦好香滑。甜粟米好多，不過個人鐘意食再甜啲嘅粟米。【單球雪糕窩夫】士多啤梨味嘅雪糕，味道天然，唔會好似瑞士糖嗰隻士多啤梨味咁人工。下面個窩夫原本係牛角窩夫嚟，不過冇晒材料所以用咗普通窩夫，不過都夠晒香脆可口。我鍾意呢度食嘢夠悠閒，周末周日同朋友一齊嚟一路傾計一路食，消磨吓時間就啱晒。