胡爐 (Closed)

尖沙咀行街諗唔到食乜？唔使講嘢，一定係去厚福街！嗰度真係勁多選擇，台式、中式、日式乜都有。今次我哋揀咗一間上樓嘅打邊爐，二百幾蚊任食，係尖沙咀呢個價錢真係唔貴，加多$38仲有嘢飲任飲，啤酒、汽水、道地樽裝茶。煲底方面我哋揀咗雞煲，用料充足，又麻又辣，多芫茜，正到爆！隻雞又夠大隻，肉質鮮嫩。海鮮拼盤你哋睇相都知佢咩料，鮑魚、扇貝、蠔都非常新鮮，又唔會有沙。去到個胡爐拼盤，牛舌心鮮甜爽口，仲有澳洲和牛，係我近期食過最高質素嘅肉食。跟餐仲有手工丸餃拼盤，平時我對肉丸同餃類都唔係太大興趣，但係佢個泰王鮮蝦雲吞真係好正，蝦夠大隻，蝦同肉比例出色，仲食到九層塔既香味，有驚喜！黑松露墨魚丸同埋芝心牛丸都非常出色，爽口彈牙。嗰晚仲識咗佢哋嘅老闆娘同經理，佢哋都非常熱情好客，親力親為，其他員工都勁好禮貌，好快會再去幫襯！