祥仔辣辣 (海運大廈) (Closed)

本身擅長法國菜嘅名廚Ricky張錦祥竟然開咗間主打川菜嘅餐廳祥仔辣辣，呢日就去試吓夠唔夠正宗🤪今次去咗海港城LCX分店，另外仲有旺角同將軍澳分店，LCX呢間如果日頭嚟可以享受到無敵海景，我夜晚去就無喇🙈不過空間感都好足夠。今次試咗個招牌二人套餐，兩款前菜加四個招牌菜加甜品，一次試匀哂咁多款，犀利在每款都係辣，但辣嘅層次完全唔同，食到明顯分別，鍾意食辣嘅人一定要嚟感受下😂酸辣紅海蜇花好開胃嘅前菜，海蜇花同萵荀都好爽口，萵荀有種好特別嘅清甜味好好食，醬汁帶輕微辣味，忍唔住係咁食😂招牌口水雞見到咁多紅油有啲驚😂不過唔算好辣，麻香十足，雞肉啖啖肉唔鞋，加埋滿滿花生好有咬口。招牌祥仔酸菜魚酸菜魚係套餐之中最大份嘅菜式，魚肉同芽菜份量多到食唔晒🤣魚肉夠爽滑，食得出魚鮮味🐟辣度叫咗微辣不過辣勁都十足，花椒香味好突出。配料有芽菜同蓮藕片，好爽口。宮保蝦仁有少少新派感覺嘅菜式，因為除咗辣之外多咗份酸甜，蝦仁裏上薄薄粉漿，所以有啲似辣辣哋嘅咕嚕蝦球，有齊酸、甜、辣三種層次，鍾意蝦仁份量好多，粒粒都勁彈牙，好新鮮🦐🦐自家酸菜炒肉末配薄餅川式酸菜揉合京式薄餅，加上酸菜令肉末增添口感同酸香，不過啲肉略為乾少少。