老川皇

Open Now

Now Closed

老婆話想食辣野，帶左我去油麻地果間老川皇。地點唔易搵，好易行過龍，唔係佢帶我去都未必搵得到。上到去，雖然環境一般，但大姐們好熱情地招呼，別有一番風味。食物選擇非常多，但老婆大人早有target! 我地兩個人共點左一涼粉一雞一串燒一魚一茄子。涼粉真係好涼，加分。涼粉切到薄一薄，質地爽滑，有料到！上面那醬汁酸酸甜甜帶微辣，好醒胃。但佢個後勁都幾凌厲，慢慢辣味先上返喉嚨，要小心。口水雞凍上，好爽滑。雞件好多好足料。雞肉醃製方法講究，保留到鮮味。醬汁依舊酸辣為主，但口水雞甜味會重小小。羊肉串燒相對比較失色，火侯過左比較乾，但調味本來做得不錯。鐵板茄子真係鐵板上，熱辣辣香味湧過黎。茄子徹底燒熟，可以輕易夾開，入口軟綿綿。醬汁杰杰地，有少少肉碎，沾滿原條茄子，口感一流。水煮魚先係重頭戲，絕對出色。水煮魚一斤起，非常足料，魚肉唔係淺賞，係食極都有。魚肉夠滑，新鮮有魚味。湯底夠辣，十分惹味，辣中仲帶有一點酸、一點香、同一點麻，層次十分豐富。而且佢地既製作十分認真有誠意，因為缺貨，店員仲特登出去買花椒添。整體黎講，野食選擇多，功夫到家。當中水煮魚確係誠意之作。價錢亦唔貴，兩個人食到要打包，都係四百蚊鬆d