Casa Cafe & Bistro

Open Now

Now Closed

今日約左個舊同事黎呢邊食野，呢到好近海邊，好舒服，環境亦好清幽。呢到嘅lunch set 都好抵食，加沙津都只係$10。我叫左個炸魚薯條，一向都幾鍾意食炸魚薯條，因為唔單止夾，仲好香口，而呢份炸魚薯條亦做到呢樣野。一切開，炸魚已經冒緊熱氣，表示係新鮮炸起，加上魚肉炸得好幼滑，而薯條就炸得好香脆，係一份幾高質既炸魚薯條。 而朋友就叫左個日式咖哩和牛漢堡茄蛋珍珠飯，成個飯製法好簡單，但質素一D都唔普通。和牛漢堡質感好結實，食落好有滿足感，加上日式咖哩味道好香濃，而且濃而不辛，好易入口又唔會蓋過漢堡既味道，配搭得非常好。 沙律配搭得幾好，而且蔬菜都好新鮮。 呢到嘅飲品都好多款，我地揀左個薰衣草檸檬花果茶，薰衣草味道都幾濃，而且濃得黎又好清香，配埋淡淡既茶香味，又解膩又好飲。 呢杯朱古力都算係一個亮點，雖然飲完發覺只係用朱古力粉沖，但一D都唔輸蝕，因為朱古力沖得好幼滑好creamy，加上榛子味道好香濃，算係平民版既高質朱古力。