Seafood ghost (Closed)

每日早上返工都經過，心諗改個咁抵死嘅名，唔知好唔好食呢?咁啱姨仔入嚟食飯，一於去試吓先！“招牌烤魚”坐低睇餐牌就俾佢吸引住，仲要寫招牌，有江團魚、珍珠鱲同海鱸魚，我地點咗小辣海鱸，肉質實淨但唔鞋口，小辣都幾惹味，都冇拆招牌，唔錯！“香濃豬骨鍋”食完條魚，我地就點個豬骨鍋，一向喺街打邊爐都喜歡食豬骨鍋，仲一定會喺最後先食舊豬骨，呢度個鍋嘅味道都幾香，湯底好甜！“十優狀丸” 見到手打丸我地就發光，並唔係機製可比，呢個有五種唔同口味，包括墨魚丸、鯪魚丸、蝦丸、黑墨丸同黑松露墨魚丸，每樣兩粒成為十優，手打就係新鮮，特別推介係黑松露墨魚丸，食落有香香嘅黑松露味道，配上彈牙墨魚丸，絕對要讚！“牛胸爽”好掛住去深圳食嘅牛胸爽，香港唔係度度有得食到，見到呢度有就點，好多人以為係脂肪，其實係牛胸前肋骨嘅軟骨位，食落一口濃濃嘅牛味，正呀！最後要介紹“提子乳酸梳打”，口感清新，唔飲啤酒可以試吓呢杯凍飲，好解渴！