家賀屋

今次嚟到銅鑼灣嘅家賀屋，刺身好新鮮好好食！餐廳招牌嘅特選海鮮丼定食多款高質食材，而且價錢公道，每款海鮮都好食到停唔到口～尤其係海膽，好有海水味之餘好甘香，大大啖食落去好滿足🤤後來覺得太好味再單點追加多份海膽，就咁食又得，如果覺得太膩亦都可以放上紫菜包住食，兩個食法都咁好味！另外幾款都好出色，三文魚又厚又香魚油味，肥瘦均勻，仲有個醬汁鮑魚都幾特別，以前食日本料理比較少試到。除此之外再叫左兩隻生蠔，大大隻又夠肥美，齒頰留香回味無窮😋跟住就到壽司同埋其他熟食，鮟鱇魚肝絕對係必食推介，嗰種魚肝嘅油香真係唔係其他食物可以比擬得到。三文魚湯都好好飲，夠晒火侯熬出嚟嘅魚湯好入味，匯聚晒三文魚嘅精華，飲過翻尋味～最後梗係唔少得叫返杯碳酸果酒～有多款不同口味，巨峰提子果汁幾好飲，甜甜地酸酸地好易入口，唔會話好大浸酒味，chill下送刺身一流。總括而言，整體用餐體驗非常好，餐廳環境都好闊落，食物質素亦高，加上位於銅鑼灣地點都好方便，鍾意食日本嘢嘅話不妨一試！