TATA KSR 韓式。燒烤 (Closed)

放工去蘇屋邨探索之前，經過附近嘅斜坡，發現咗一間有得飲燒酒嘅韓式小店，所以入咗去同個frd醫一醫肚。一入去見到有IU poster同播緊魷魚遊戲，成間舖都充滿住韓國文化～侍應廚師們都好nice，推薦我哋嗌佢哋新自家出品嘅年糕奶茶，我一聽到個名打晒黑人問號，不過以獵奇心態就嗌咗杯無糖年糕奶茶，可能係因為無糖關係，個茶底有啲淡，奶味比較多，茶味比較淡但入面有細粒圓桶形嘅年糕，都幾煙韌，可能下次嗌返少糖就會好飲啲。講返正食，我哋一行兩人嗌咗個兩人份量嘅部隊鍋。個底係公仔麵，湯底係泡菜湯底加芝士，值得一讚嘅係浸芝士味好濃郁，愈煲愈濃味，愈食愈邪惡，食到最尾變咗泡菜芝士汁，very good！鍋入面仲有翠肉瓜、午餐肉、圓扁型年糕，同埋我最愛之一嘅金菇！麵底都幾多，兩個人食都好飽，但要小心啲麵好快發脹，所以我哋喺啲麵發脹之前就拎晒出嚟放咗喺個碗到，都未至於去到一脹不可收拾嘅地步。前菜有牛骨湯同泡菜，值得一提嘅係牛骨湯入面嘅牛丸好彈牙，同埋湯底應該冇咩點落味精，淡淡哋幾好飲。