南記飯店 (Closed)

好耐無黎食，早幾年真係個個禮拜黎咁滯，後來成日無位就少左黎。尋晚再黎有位，雖然而家太子爺打骰，但仍然維持以往裝修，無點大執過，檯仍然幾迫。坐落叫左半隻咸雞，一碟椒鹽九肚魚，一碟豉油王鵝腸，一窩蠔仔粥。雞仍然同以前咁上下幾有雞味，肉就鞋左少少，半隻既份量唔少，無坊間個D奀支支得十零件又話半隻咁差，椒鹽九肚魚係我至愛，呢到既九肚魚好大件，唔似出面白飯魚咁細，肉又滑。豉油王鵝腸用芽菜底索晒D豉油好咸，鵝腸亦係急凍貨，下次可以唔叫。成晚個蠔仔粥最差，料少過以前好多之餘，粥又好淡下，D魚乾仲好硬同大塊，煲得唔夠火候，而且份量少左好多。整晚最好食都係九肚魚同雞，不過埋單兩舊幾好抵食，懷舊完可能又要隔好耐先再黎啦。