坤記煲仔小菜

Open Now

Now Closed

當日接大佬放工睇側田演唱會之前，再幫襯當年服務同食物不成正比嘅坤記煲仔飯。18:00去到，成棚人大概2、30人企晒喺門口等位。好彩大佬係常客，當日喺度食晏時同啲樓面姐姐留咗枱。坐室內或室外，都係咁上下逼。當日天氣都涼，見好多人都點咗豬骨煲或者煲羊腩煲。我就叫咗一個白鱔滑雞煲仔飯同沙嗲牛肉粉絲煲。都唔洗諗個牛肉煲先到，香濃沙嗲帶少甜，花生味好出，牛肉係一貫滑牛貨，粉絲量都可以，事實係比出面普通酒樓好食。等咗9個字，冇錯係45分鐘個煲仔飯終於上枱，熱辣辣，香噴噴。白鱔大大舊，滑而不爛有彈牙感，味道鮮甜油香，冇一股泥味，真係一讚。滑雞普通。最緊要係個飯，好香唔會有爛飯，粒粒飽滿，飯焦呢個賣點梗係冇欺場，啱啱好香而脆口，焦香得嚟唔係𤓓味。其實食物真係值得推介，不過坐位唔享受，服務一貫作風。而且宜家涼涼哋，好多人去食煲仔飯，等候時間同等食物時間長，真係好得閑唔趕時間嘅不妨去食個煲仔飯。