Hokahoka

Open Now

Now Closed

朋友介紹之下嚟咗呢一間日本菜，朋友話呢道有人會現場唱歌，不過好可惜今日冇得坐榻榻米冇得睇。一坐低佢就俾咗一杯茶同埋一個小小前菜。見到呢個味噌前菜就知道呢間餐廳一定好地道。見佢個menu都幾多選擇，唔覺唔覺兩個人叫咗一份墨魚咀、一份清酒煮蜆、兩串燒牛舌、一份枝豆、一份燒明太子同一個味噌飯團。墨魚咀令人非常驚艷，炸得恰到好處，脆脆嘅外殼包住炸剛剛好嘅墨魚咀，仲好多汁。清酒煮蜆亦好鮮甜，好大隻，雖然唔係隻隻都完全冇沙但係都算清得幾乾淨。而燒牛舌亦好厚，但唔會過熟，燒得岩岩好，非常軟嫩。比較失色嘅係枝豆同埋味噌飯團。唔係話唔好食，不過相比之下枝豆冇特別出眾，而味噌飯團亦略鹹咗少少。最後想特別一提嘅係燒明太子，我同朋友都係抱着試一試嘅心態，我唔可以話非常鍾意食但係佢嘅味道好特別，因為比較鹹如果配酒會非常之夾，推薦大家試下。