路邊攤

Open Now

Now Closed

冇咗 $288嘅4 Options，得返6 Options $388同8 Options $588。貴啲係咪等於份量多啲，唔一定。$588雲吞每人一粒，$388雲吞每人有兩粒。乳鴿都幾多人叫，跟膠手套，不過戴晒手套食緊嘅時候，店員就走埋嚟收碟，要我用手執返幾片酸蘿蔔好肉酸。如果唔夠食可唔可以加餸，問咗兩次，店員都唔答幾錢，淨係遞個餐牌埋嚟問想加乜，死都唔講幾錢，亦都好堅持話，你實夠飽，通常冇人會加。味精好重，係咪想令你嗌嘢飲就唔知啦。環顧四周幾張枱，都冇人嗌嘢飲，選擇唔吸引。當晚停咗雨，不過好潮濕，佢哋室內外相連，唔閂門，個冷氣長噴吹到你頭痛亦有滴水，店員係唔除鞋直接踩上凳抹水，佢哋張凳黑色，所以睇唔到腳印。大排檔feel係咪等於音樂要勁大聲？可能想嘈到你傾唔到偈，食飽快啲埋單走人交枱做下一輪。店員都幾西，如果係sell港式大排檔鑊氣，做乜整個ABC同你講英文，即係唔係做我哋本地客生意啦， sorry我英文唔好，埋單連+1近700人頭，附近都有其他選擇，起碼坐得舒服啲，同埋唔會頸渴到你頭痛成晚。