民華餐廳

Open Now

Now Closed

今日收工按完摩都九點幾，同朋友都未食晚餐，近近地搵間茶記食下。朋友推薦呢間茶餐廳，話以前成日嚟食，講到咁，好啦！同你嚟回味下。😂呢知鐘數食飯太飽，食包又到喉唔到肺，食個常餐就岩岩好。我地一人一個常餐，都係清清地，一個雪菜米，一個炸菜通。炒蛋係呢度必食，我就嗌左腸仔炒蛋，多士加鍊奶，多士新鮮軟熟，而我個炒蛋意外地撈到鍊奶，溝埋個蛋甜甜地又幾好食。朋友就嗌左個午餐肉，同普通油多。最後，女孩子們當然要食埋個甜品先甘心啦，所以就嗌左個西多士，西多都好軟熟，同埋唔會話十分油。題外話，我估唔到呢間茶記呢個鐘數都多人到要等位，我諗佢都真係有好多忠粉（我朋友都係其一），同埋呢度啲阿哥阿姐都好好人，好有禮貌又有笑容，呢樣都係我意料之外嘅事。