九份•十分 (T Town ) (Closed)

依間食台灣菜嘅餐廳好味到令我再黎食多次。今次都有叫到醉小三($148)，酒香濃烈。最中意佢嘅鴨舌，愈嚼愈惹味。鮑魚一樣都係咁飽滿爽口。而醉蝦非常鮮美，仲好貼心咁剝走咗蝦頭。古早醉鴿($88)，燒乳鴿就食得多，所以好好奇醉鴿會係咩味道。估唔到有食到乳鴿肉嘅鮮甜，仲帶有淡淡酒香味，而且骨肉比例均等，如果有啤酒就一流~鹽酥雞扒麵(62)，雞扒金黃色，香脆嫩滑。麵可以揀粗或幼，清湯上，一啲都唔油膩。老媽煎餃子($36/5隻)，皮身煎得非常之脆，而入面嘅菜肉熱騰騰，食得出係即叫即煎！叫咗2杯飲品。紅心皇后($58)即係草莓沙冰，非常非常非常大杯，沙冰堆滿到過杯頂，賣相唔錯，酸酸甜甜好開胃。紫薯珍珠($28)，難得見到紫薯味緊係要試番杯，中意佢紫薯味唔重，唔會太膩，而且珍珠好煙韌。最後仲有甜品白玉珍珠雙色冰淇淋鬆餅($58)，俾佢嘅賣相吸引住，窩夫非常鬆脆，雪糕係雲呢拿同香芋，周邊都配有草莓、奇異果、珍珠同埋丸子，雖然cream有啲多，但係味道唔重。