豬屋日本料理

Open Now

Now Closed

最近睇Openrice，發現上水開左間新嘅日式小店。食評雖然唔多，但見佢價錢唔貴，決定試一試。星期一晚上六點左右到達，當時只有兩枱客人。小店用QR落單，選擇好多，睇到眼花遼亂。最終揀左一飯一麵再加一款卷物。無加一，TOTAL $186。吉列豬扒配咖哩飯 $59豬扒即叫即炸，上枱果陣仲熱辣辣，食落外脆內軟；豬扒輕輕調過味，雖然薄身，但依然有肉汁，呢個價錢，呢個質素同份量嘅豬扒，無投訴。咖哩偏甜，味道似以前KFC咖哩飯嘅味。飯量好多，男仔食完應該會好飽。豬軟骨拉麵 $65本身對呢個拉麵無期望，因為通常呢個價位嘅麵唔會好食。點知呢個麵出奇地好味 麵條雖然無麥味，但亦無鹼水怪味，而且煮到係我中意嘅偏硬口感。豬軟骨偏碎，但個味唔差，撈埋個麵好好味。個溏心蛋浸到入味，係熟左少少扣少少分。至於湯底就略鹹，不過整體比想像中好。吉列炸蝦卷 $62呢個價錢都有八件，非常抵食。蝦卷好脆，不過蝦味偏弱，食落主要係沙律醬味😅，加上淡淡嘅芝士香。食物整體味道算合格，未到好正，但價錢相當親民，如果我住呢度附近，久唔久都會嚟食😏。以我所知，餐廳暫時只收現金，請各位食之前做好準備。