龍泉冰室 (Closed)

收工好想食港式茶餐廳既美食，約埋朋友嚟九龍城既冰室，仲叫左好多野食。淨係餐牌都已經有好多頁，常餐、咖喱、鐵板餐、焗飯、小菜等通通都有。燒汁雜菌茄子炒牛柳粒小菜套餐配埋老火例湯、白飯同埋飲品。牛柳粒都幾大舊，軟腍得嚟幾入味，同茄子既份量係一比一，醬汁既味道調得幾好，送飯一流。醬油豬頸肉煎蛋撈公仔麵豬頸肉切成條狀，幾有咬口。公仔麵既軟硬度適中，份量可以再多啲就更好。菜心走油既菜心，食落幾爽口，份量都唔少。奶茶紅豆冰奶味同茶味既比例控制得幾好，唔會太過甜，連埋底下既紅豆一齊食，真係唔錯。呢個值得加錢一試。雜果賓治雜果幾大粒，放滿左半個杯，夏天飲番杯凍飲消暑降溫就啱哂。