川熙樓 (Closed)

原本約好晒咁晚去食四川菜，最衰自己早兩日去咗食燒烤，搞到喉嚨痛。原本打電話諗住取消預約，好彩自己都多口問一問店員:。店員同我講佢哋嘅menu 有3分之一都係唔辣嘅款式，或者少辣，適合唔太識食辣嘅朋友。。。既然喉嚨痛唔識得辣都啱食，今晚我哋就照舊食四川菜。川熙樓係君怡酒店，唔使講環境同裝修一定有返咁上下。最令我開心嘅事，係之前去食四川菜，食完成身衫褲都有一陣麻辣味。今次則非常清爽！一坐低店員就招呼我哋飲佢哋來自四川嘅苦蕎茶。佢源自四川，有減肥、降血脂、糖尿病等功效，我喉嚨痛，飲多啲，都有消炎作用！首先叫左店員介紹既椒汁象拔蚌 例牌 HK 168。唔食辣嘅朋友仲可以選擇芥辣醬油味。黎到食川菜，當然都想試吓麻辣嘅本色。象拔蚌好爽口，加上少少麻香，回味無窮！晾衣白肉 HK 98叫呢款菜式，主要係因為見到個造型好靚。而且個那辣醬係分開上，所以都適合我食。白肉係豬肉，雖然半肥瘦，但係完全食唔到油膩嘅感覺，加埋青瓜更清新。刀法如神，薄切考功夫。個香辣醬，雖然我只係食咗少少，但係非常讚！川式慢煮牛肋骨 HK 228 小份慢煮既牛肋骨同辣醬分開上，呢個菜式係我全晚嘅推介！慢煮既牛肉質感非常爽脆，好柔軟！