野玩田店 (Moved) New Location

聖誕新年，每日都都大魚大肉，打邊爐燒烤，樣樣齊，真係要食清啲，Detox下。明查暗訪之下，搵到尖沙咀K11 Natural嘅野玩田店Something Wild The Farm，主打健康路線，聽聞仲自家種迷你菜，加入菜式當中。餐廳以木系同綠草為主調，充滿田園氣息。去到餐廳門口，即刻見到一排排自家種嘅紫芥蘭頭，仲分唔同日子。店員話佢哋會用呢啲迷你菜嚟煮食，認真係最新鮮。麵包籃麵包籃內有餅乾條同麵包。麵包好軟熟，好香芝麻同蜜糖味，餅乾條非常香脆。燒焗本地黑毛豬鞍架 (12oz) 及扒菠蘿配燒汁我哋叫咗精選本地農場系列嘅本地黑毛豬鞍架，非常厚身。切落去嘅時候，肉汁不斷流岀嚟，鮮嫩多汁。黑毛豬無咩加醃料，入口食得出黑毛豬本身嘅肉味，一啲都唔韌，加埋燒菠蘿，清新香甜，正。煙三文魚闊條手造意大利麵手造闊條麵入口彈牙，掛起晒啲蕃茄醬。加埋煙三文魚同蕃茄肉，真係好開胃。牛油炒栗子剝晒殼嘅栗子，粒粒都好大粒，入口仲有輕輕牛油味，唔錯。巴黎汁焗時蔬話明係健康餐，呢碟巴黎汁焗時蔬非常豐富，有唔同顏色嘅蔬菜，有西蘭花、紫椰菜、椰菜花、粟米仔、青瓜、露笋等。蔬菜新鮮焗起，吸收晒巴黎汁嘅精華，加埋芝士好惹味。