Video
Read full review
2018-01-15
4883 views
上到嚟荃灣川龍飲茶，其實喺配菜，主菜無非都喺為行山，但出發前到吓舊式茶居，嘆吓一盅兩件，並感受吓鄉間濃情。由於，今次喺由川龍走小徑一直剷上大帽山，難度較高，所以，就只喺同個老友二人行。由於對上一次嚟已幫襯過端記，故今次就幫襯吓彩龍。彩龍，好似端記咁，你話佢懷舊又得，話佢地踎都得，總之，晌度食情懷、風味，多過環境同味道。咁都介紹吓個環境先，一入店內，喺開放式自助廚房，見到師傅即拉腸粉、灼菜，炸嘢亦喺晌度製作。而服務比食自助餐更自助，先晌裡面櫃枱開張點心記錄卡就可以拎點心，而洗壺、沖茶就全自動，茶客自已搞掂。再入啲喺第一個用餐區，地方比較細同窄，始終裡面仲有嘅地方間咗嚟製作點心；上到二樓第二個用餐區，地方就大好多，四邊都喺窗，光猛開揚啲。講到心水，都喺出面嘅戶外位，放心，喺有瓦遮頭嘅，感覺特別有風味。晌度基本喺唔會有人招呼，自己揀位隨便坐。由於我哋嚟得早，仲未到爆場階段，只有兩乘滿，不過，過咗9:30am，就多人到不得了，要有被搭枱嘅心理準備。食物價錢都喺周圍貼，晌廚房一邊牆上搵到小、中、大、特點價目表，而另一邊就貼有基本點心屬咩點，點心都喺傳統款式，不過，部份點心或菜式嘅價錢就唔喺好知晌
彩龍，好似端記咁，你話佢懷舊又得，話佢地踎都得，總之，晌度食情懷、風味，多過環境同味道。咁都介紹吓個環境先，一入店內，喺開放式自助廚房，見到師傅即拉腸粉、灼菜，炸嘢亦喺晌度製作。
而服務比食自助餐更自助，先晌裡面櫃枱開張點心記錄卡就可以拎點心，而洗壺、沖茶就全自動，茶客自已搞掂。
再入啲喺第一個用餐區，地方比較細同窄，始終裡面仲有嘅地方間咗嚟製作點心；上到二樓第二個用餐區，地方就大好多，四邊都喺窗，光猛開揚啲。
講到心水，都喺出面嘅戶外位，放心，喺有瓦遮頭嘅，感覺特別有風味。晌度基本喺唔會有人招呼，自己揀位隨便坐。由於我哋嚟得早，仲未到爆場階段，只有兩乘滿，不過，過咗9:30am，就多人到不得了，要有被搭枱嘅心理準備。
食物價錢都喺周圍貼，晌廚房一邊牆上搵到小、中、大、特點價目表，而另一邊就貼有基本點心屬咩點，點心都喺傳統款式，不過，部份點心或菜式嘅價錢就唔喺好知晌邊度搵，而茶位收$5，當然，無加一服務費啦。
因為老友有啲食物唔食得，小弟就有殺無賠格，乜都食，所以，由佢發辦負責拎嘢食，只喺兩個麻甩佬，一拎就一大盤嘢食返嚟，一於食飽啲起行。
蟹籽燒賣啲燒賣做得頗大粒，啲餡料爆晒上嚟，入口扎實而唔會鬆泡泡，唔喺溝粉貨色，感覺又無話太多肥豬肉。
四寶雞扎唔怪之得喺特點，兩件雞扎非常足料，揭開外層嘅腐皮，雞件、魚肚、芋頭、火腿塞滿晒晌裡面，一次過試到多款食材，各有唔同味道，喺多心嘅人心水之選。
叉燒腸粉雖然喺有師傅現場即拉，但腸粉皮並未如預期般柔滑，其實，從外觀都見外皮稍厚，而叉燒嘅份量都OK，亦都唔肥，所以，整體只叫合格。
灼西洋菜西洋菜晌川龍喺出名嘅產品，當然，依家仲有幾多人晌川龍有種西洋菜，而人客又咁多，所以，想像到所食嘅都未必全部喺川龍出品。碟菜好大碟，食落都仲有少少爽爽哋，灼得啱啱好，又有菜味。
鳳爪排骨飯老友怕我食唔飽，專登拎個盅頭飯，鳳爪排骨喺惹味之選，排骨就多，鳳爪得半隻，醃得味道不俗，有豆豉香，飯粒分明爽身，添啲豉油已好好食。
廚房一邊仲有個凍櫃，提供多款甜點：凍豆花、芒果布甸、桂花杞子糕、椰汁馬豆糕，想必喺為爭取多啲後生客。
有時，嚟呢啲地方，都唔喺完全打算食咩美食，都喺享受吓個環境，感受吓嗰份鄉間情懷。食飽，起行，由川龍，經響石墳場，走山徑小路，到山火瞭望站，再上到大帽山，好玩，有挑戰性，景觀一流，最可惜喺有層層煙霞似的，大剎風景。
整體，彩龍嘅出品只喺中等，但風味搭夠！上嚟飲個早茶，之後，唔一定上大帽山嘅，下走經龍門郊遊徑落城門都喺唔錯嘅選擇。
Post
