逸派咖啡

Open Now

Now Closed

行過維景酒店見到有個餐牌，外賣飯盒$35，仲包湯包茶，2023年喇喎，有冇咁平呀？睇吓啲選擇，都係啲大路嘢，黑椒雞扒飯粟米豬扒意之類，都明解嘅，咁嘅價錢唔通俾鮑魚你食咩。我叫咗個蝦餅炒烏冬，即係平時泰國舖啲炸蝦餅切條，用類似上海粗炒嘅做法，食落都幾惹味。份量足秤，好墜手，同平時茶記碟頭飯咁上下大細，夠飽的了。餐湯有中湯西湯，我選西湯，橙紅色比較杰身，好濃蕃茄味，幾開胃好飲，但又唔似港式羅宋湯，唔知係咪蕃茄忌廉湯。餐飲問侍仔有咩揀，佢話熱檸茶或熱檸水，咁熱檸茶啦。維景酒店雖然比較豆泥，但衰衰地都係一間正式酒店，所以啲餐具餐盒都會用好少少嘅，起碼個膠袋都印住酒店個招牌，唔似一般茶記求求其其，啲膠叉熱少少都鬈。喺而家呢個食老麥都成$40嘅時勢，$35可以食到酒店飯，算係非常難得，絕對係兩餸飯以外嘅一個好選擇。