喜運點心專門店 (Closed)

想食一盅兩件，除咗酒樓之外其實都仲有選擇嘅！石門呢間喜運點心專門店，喺正石門站出面，位置極方便，雖然鋪面細細地，未必有酒樓坐得咁舒服，不過食物質素都好唔錯。佢有點心、包類、腸粉類和飯麵等，全部明碼實價，唔係分大中小點，特別推介佢嘅孖寶優惠，可以揀蒸飯加點心或者腸粉加點心，分別都係$48或者$45 ，我覺得都幾抵。今日就試晒兩個蒸飯孖寶，有鳳爪排骨飯和北菇滑雞飯，點心都有八個選擇，我哋就揀咗鮮蝦燒賣皇同埋陳皮鮮竹牛肉球。蒸飯份量多，味道不錯，兩款都ok。燒賣都大粒，上面有蟹籽。牛肉球一碟三粒，陳皮味就唔係好覺，同酒樓嗰啲冇乜分別。另外我哋都仲叫多咗兩個點心，鮑螺片棉花雞（ $27 ）同埋一碗上湯鮮蝦水餃（ $42），一碗有五隻仲有菜，都好新鮮好味又大隻。棉花雞一向係我喜歡嘅點心，呢度都做得唔錯，啲棉花索晒啲汁好味，鮑螺片煙韌，雞又夠滑。由於唔洗加一，埋單價錢平過飲茶！